ЕО Армения тауарларына бажды алып тастайды

Еуропалық одақ Армения экономикасын қолдау мақсатында елден импортталатын бірқатар тауарға салынатын кедендік бажды уақытша алып тастауға дайындалып жатыр, деп Baspasoz.kz тілшісі Kazinform.kz-ке сілтеме жасап хабарлайды.

ЕО Кеңесінің мәліметінше, мүше мемлекеттер Армения өнімдеріне қатысты сауда талаптарын уақытша жеңілдету шараларын ресми түрде мақұлдады.

Жаңа тәртіп бойынша Арменияның Еуропалық одаққа шығаратын өнімдерінің шамамен 80 пайызына қазіргі сауда шектеулері қолданылмайды. Оның ішінде бірқатар тауарға, соның ішінде кейбір ауыл шаруашылығы өнімдеріне салынатын кедендік баж екі жылға тоқтатылады. ЕО Кеңесі бұл қадам Армениядан Еуропалық одақ елдеріне жеткізілетін тауар көлемін арттырып, екі тарап арасындағы сауданы дамытуға бағытталғанын мәлімдеді.

Сонымен бірге армениялық тауарлар импорты Еуропалық одақтағы өндірушілерге кері әсер еткен жағдайда, Брюссель ішкі нарықты қорғау шараларын қолдана алады.

Бұған дейін Еуропарламент мақұлдаған құжатты ЕО Кеңесінің қабылдауымен заңнамалық рәсім толық аяқталды.

Жаңа ереже Еуропалық одақтың ресми журналында жарияланғаннан кейін келесі күні күшіне енеді. Жеңілдік екі жыл бойы қолданылады.

Бұған дейін Еурокомиссия төрағасы Урсула фон дер Ляйен Армения экспортының шамамен 80 пайызына Еуропалық одақ нарығына бажсыз кіруге мүмкіндік беру жоспарланып отырғанын мәлімдеген еді. Ол бұл туралы Ереванда Армения премьер-министрі Никол Пашинянмен кездесуден кейін хабарлаған.