Франциядағы наразылық: 400-ден астам лицей жабылады

Францияда жаппай наразылықтар мен тәртіпсіздіктерге байланысты 2 қазанда 400-ден астам лицей уақытша жабылып, сабақтар қашықтан өтеді. Бұл туралы елдің Ұлттық білім министрі Эдуар Жеффре мәлімдеді, деп Baspasoz.kz тілшісі Kazinform.kz-ке сілтеме жасап хабарлайды.

Министрдің айтуынша, апта басынан бері жалғасқан наразылықтар кезінде 170 жоғары сынып оқушысы мен 65 білім беру мекемесінің қызметкері зардап шеккен.

Эдуар Жеффре наразылық кезінде болған зорлық-зомбылық пен мемлекеттік мекемелерді қирату әрекеттерін айыптады. Ол оқушылар қозғалысына радикалды топтардың ықпалы күшейгеніне алаңдаушылық білдіріп, кәсіподақтар және студенттік ұйымдармен диалог жалғасатынын айтты.

Жоғары сынып оқушыларының наразылығы өткен аптада Париж орналасқан Иль-де-Франс өңірінде басталып, кейін елдің басқа аймақтарына тараған. Оқушылар сабақ кестесінің шамадан тыс тығыздығына, мұғалімдердің жетіспеуіне және білім беру жүйесіндегі бірқатар мәселеге наразылық білдіруде.

Кейбір өңірлерде бейбіт шерулер тәртіпсіздікке ұласып, полиция мен наразылық білдірушілер арасында қақтығыс болған.

Соңғы мәлімет бойынша, тәртіпсіздіктерге қатысы бар деген күдікпен 2 мыңға жуық адам ұсталған. Олардың шамамен 1,8 мыңы қамауға алынған.