Кенияда Эбола вирусын жұқтырған тағы бір адам анықталды
Кенияда Эбола вирусын жұқтырудың екінші жағдайы тіркелді. Дүниежүзілік денсаулық сақтау ұйымы (ДДҰ) індеттің таралуына жол бермеу үшін ел билігіне қолдау көрсетіп жатыр, деп Baspasoz.kz тілшісі Kazinform.kz-ке сілтеме жасап хабарлайды.
БҰҰ жаңалықтар қызметінің мәліметінше, 39 жастағы ер адамнан Эбола вирусының Бундибуджио түрі анықталған. Ол – 5 қазанда осы аурудан көз жұмған алғашқы науқастың туысы.
Ер адам бұған дейін науқаспен байланыста болған адамдардың тізіміне енгізіліп, карантинге алынған. 13 қазанда оның бойынан ауру белгілері байқалған.
ДДҰ-ның Кениядағы өкілі Нима Русибамайила Кимамбо ел билігінің індетке қарсы қабылдаған шараларын жоғары бағалады. Оның айтуынша, алғашқы науқаспен байланыста болған адамдарды дер кезінде анықтап, оқшаулау вирустың таралу қаупін азайтуға мүмкіндік берген.
“Бұл ауруды жеңу тек үкімет пен халықаралық ұйымдарға байланысты емес. Әр адам өз жауапкершілігін сезініп, сақтық шараларын орындаса, індеттің таралуын тоқтата аламыз”, – деді ол.
Алғашқы науқас Конго Демократиялық Республикасында тұрған Кения азаматы болған. Ол 3 қазанда Уганда арқылы еліне оралып, екі күннен кейін Найробидегі ауруханада қайтыс болған. Осы жағдайдан кейін дәрігерлер марқұммен байланыста болған 40-тан астам адамды анықтаған. Олардың арасында ұшақ жолаушылары, экипаж мүшелері, әуежай қызметкерлері, медицина мамандары және науқастың туыстары бар.
Қазір олардың басым бөлігі карантинде жатыр. Ал жұқтыру қаупі төмен бірнеше адам дәрігерлердің бақылауымен үйінде оқшауланған. Сонымен қатар мамандар әзірге байланысқа шыға алмаған алты жолаушыны іздестіріп жатыр. Олардың шетелдік телефон нөмірлерін пайдаланатыны белгілі болды.
ДДҰ өкілінің айтуынша, қазіргі жағдайда шекараларды жабу немесе халықаралық сапарларға шектеу қою қажет емес. Дегенмен елге келетін жолаушылардың денсаулығын тексеріп, ауру белгілері бар адамдарды дер кезінде анықтау маңызды.
Айта кетейік, Конго Демократиялық Республикасында Эбола індеті жеті провинцияға таралған. Дүниежүзілік денсаулық сақтау ұйымы аурумен күресте оң өзгерістер байқалғанын хабарлаған.