Қытайда робот өндіретін роботтар пайда болды
Қытайдың UBTECH Robotics компаниясы робот-гуманоидтарды басқа роботтардың көмегімен құрастыратын өндіріс орнын іске қосты. Лючжоу қаласында орналасқан зауыт жылына 10 мыңға дейін робот шығаруға қауқарлы, деп Baspasoz.kz тілшісі Zakon.kz-ке сілтеме жасап хабарлайды.
Зауыттағы өндіріс қарқыны жоғары. Мұнда шамамен әр 10 минут сайын бір робот құрастырылады. Кәсіпорында негізінен Walker S және Cruzr серияларына жататын өнеркәсіптік гуманоид роботтар жасалады.
Компанияның мәліметінше, гуманоид роботтарды өндіру технологиясы зертханалық үлгілер мен шағын көлемдегі өндіріс кезеңінен өтіп, жаппай әрі автоматтандырылған өндіріске көшіп жатыр. Кәсіпорындағы көптеген процесті роботтардың өзі атқарады. Олар паллеттерді түсіріп, қажетті бөлшектер мен материалдарды тасымалдайды және өндіріс желісіндегі жұмыстарға қатысады.
Бұл технология өндірістегі автоматтандыру деңгейінің артып келе жатқанын көрсетеді. Роботтардың өндіріс процесіне кеңінен енгізілуі еңбек нарығындағы технологиялардың рөліне қатысты пікірталастарды да күшейтіп отыр.
Айта кетейік, 15 қыркүйекте Қазақстанның жасанды интеллект және цифрлық даму вице-министрі Ғиззат Байтурсынов Үкіметтегі брифингте жасанды интеллектінің адам еңбегіне ықтимал әсері туралы пікір білдірген еді.