Трамп: Канада түбінде АҚШ-тың 51-штатына айналады
АҚШ президенті Дональд Трамп Канаданы Америка Құрама Штаттарының құрамына қосу туралы ұсынысын тағы да көтерді. Ол көрші елдің түптің түбінде АҚШ-тың 51-штатына айналатынына сенімді екенін мәлімдеді, деп Baspasoz.kz тілшісі Kazinform.kz-ке сілтеме жасап хабарлайды.
Дональд Трамп бұл пікірін Аризона штатының Буллхед-Сити қаласында жақтастары алдында сөйлеген сөзінде айтты. Ол Канаданың АҚШ тауарларына салатын кедендік баждарын сынға алып, екі ел арасындағы сауда қатынастарына көңілі толмайтынын жеткізді.
“Канада бізге үнемі әділетсіздік жасап келді. Бірақ қазір жағдай өзгерді. Енді бәрі басқаша. Олар кедендік баждар арқылы бізден пайда көрді. Мұны ешқашан ашық айтпайды. Біз бұған бұдан былай төзбейміз”, – деді Трамп.
Америка басшысының айтуынша, АҚШ Канадаға жыл сайын қомақты қаржы жұмсайды. Алайда ол көрші мемлекетке мұндай көлемде қолдау көрсетудің қажеті жоқ деп есептейді.
Трамп осы мәселені шешудің бір жолы Канаданы АҚШ құрамына қосу екенін тағы да алға тартты.
“Түбінде Канада 51-штатқа айналады. Өйткені мәселені шешудің жалғыз жолы осы. Бізге олар қажет емес, керісінше, біз оларға керекпіз. Ендеше неге өз құрамымызға кірмейтін елді қолдау үшін жыл сайын 80-90 миллиард доллар жоғалтуымыз керек?” – деді АҚШ президенті.
Айта кетейік, Дональд Трамп бұған дейін де Канаданың АҚШ құрамына қосылуы туралы бірнеше рет мәлімдеме жасаған. Дегенмен бұл әзірге оның саяси ұсынысы ғана. Канаданың мемлекеттік мәртебесін өзгерту жөнінде екі ел арасында келісім жасалған жоқ.