Уоррен Баффетт Berkshire Hathaway басшылығынан кетті

Әлемдегі ең бай адамдардың бірі, инвестор Уоррен Баффетт Berkshire Hathaway компаниясының директорлар кеңесі төрағасы қызметінен кетті. Ол бұл шешімін компания акционерлеріне жолдаған хатында жариялады, деп Baspasoz.kz тілшісі Tengrinews.kz-ке сілтеме жасап хабарлайды.

96 жастағы Баффетт компанияда 60 жылдан астам уақыт еңбек етті. Енді ол Berkshire Hathaway-дің құрметті төрағасы мәртебесін иеленіп, директорлар кеңесінің мүшесі болып қала береді. Сонымен қатар компанияға кеңес беріп, өзінің тәжірибесімен бөлісуді жалғастырады. Оның орнына ұлы Говард Баффетт келді.

«Уақыт әрдайым жеңеді», – деп жазды инвестор акционерлерге арналған хатында.

Баффетт Berkshire Hathaway-де 1965 жылдан бері жұмыс істейді. Ол 1970 жылы компания төрағасы атанған.

Осыдан сегіз ай бұрын инвестор компанияның бас атқарушы директоры қызметінен кеткен болатын. Бұл лауазымға оның көп жылдар бойы серіктесі болған Грег Абель тағайындалды. Сол кезде Баффетт директорлар кеңесінің төрағасы қызметін сақтап қалған еді.

Баффетт Berkshire Hathaway-ді негізгі инвестициялық құралы ретінде 1960-жылдары пайдалана бастады. Осы уақыт аралығында компания акцияларының құны 5,5 млн пайыздан астам өскен. Салыстыру үшін, S&P 500 индексінің өсімі шамамен 39 мың пайызды құрады. Баффетт басқарған жылдары Berkshire Hathaway теміржол, сақтандыру, тамақ өнеркәсібі және басқа да салалардағы компанияларға инвестиция салды. Қазір оның активтерінің қатарында BNSF теміржол компаниясы, Geico сақтандыру компаниясы, сондай-ақ Fruit of the Loom, Benjamin Moore, Duracell және Dairy Queen брендтері бар.

Инвестор компанияның инвестициялық шешімдеріне де араласуын жалғастырды. Шілдеде ол Berkshire Hathaway-дің Google-дың бас компаниясы Alphabet-ке инвестиция сала бастағанын хабарлаған. Баффетт технологиялық компанияның акцияларын бұған дейін сатып алмағанына өкінетінін де айтқан. Қазіргі таңда бұл инвестицияның құны 27 млрд доллардан асады.

Уоррен Баффетт әлемдегі ең бай адамдар тізімінде оныншы орында тұр. Оның байлығы 145 млрд доллардан асады.

Инвестор өз дәулетінің басым бөлігін қайырымдылыққа жұмсауды жоспарлап отыр. Соңғы он жылда ол Билл және Мелинда Гейтс қорына шамамен 50 млрд доллар аударған. Сондай-ақ миллиардерлерді байлығының негізгі бөлігін қайырымдылыққа беруге шақыратын The Giving Pledge бастамасын құруға атсалысты.

Баффетт бұған дейін байлығының 99 пайыздан астамын өмірінде немесе қайтыс болғаннан кейін қайырымдылыққа бағыттайтынын мәлімдеген.

Енді ол Berkshire Hathaway директорлар кеңесінің құрамында құрметті төраға ретінде жұмысын жалғастырады.