15 қыркүйекте Австралия соты елдегі ең атышулы қылмыстық істердің бірі бойынша сотталған үш адамның бірін мерзімінен бұрын шартты түрде босату туралы шешімді қолдады. Джеймс Влассакис 11 адамның өліміне қатысты іс бойынша сотталған, деп Baspasoz.kz тілшісі Zakon.kz-ке сілтеме жасап хабарлайды.
James Vlassakis жасаған қылмыстар жеті жылға созылған. Құрбандардың көпшілігінің денесі 1999 жылы Оңтүстік Австралия штатының астанасы Аделаидадан солтүстіктегі Сноутаун қаласынан қышқыл толтырылған бөшкелердің ішінен табылған. Бұл қылмыстар кейін «бөшкелердегі денелер» ісі деген атаумен белгілі болды.
Оңтүстік Австралияның апелляциялық сотындағы үш судья шартты түрде мерзімінен бұрын босату жөніндегі комиссияның өткен айда қабылдаған шешімін күшінде қалдырды. Осылайша, үш сотталғанның ең жасы Влассакистің түрмеден шығуына жол ашылды.
Қазір 46 жастағы Влассакис қылмыс жасауды 1998 жылы 18 жасында бастаған. Ол төрт адамды, соның ішінде өгей ағасы мен өгей әкесін өлтіргенін мойындаған.
Влассакис іс бойынша айыптау тарапының негізгі куәгерлерінің біріне айналып, өмір бойына бас бостандығынан айырылды. Сот оның кемінде 26 жыл түрмеде отыруын белгіледі. Бұл мерзім өткен жылдың тамызында аяқталған.
Өткен желтоқсанда оған шартты түрде мерзімінен бұрын босатуға рұқсат берілгенімен, штат үкіметі бұл шешімді қайта қаратып, күшін жойдырған.
Сноутаундағы қараусыз қалған банк ғимаратынан бөлшектенген адам денелерінің табылуы және 2003 жылы аяқталған бір жылға созылған сот процесі бүкіл Австралияның назарын аударған. Кейін бұл оқиға туралы кітаптар жазылып, 2011 жылы «Сноутаун» фильмі түсірілді.
Шартты түрде босату жөніндегі комиссияның төрағасы Фрэнсис Нельсонның айтуынша, Влассакис жасаған әрекеттеріне үнемі өкініп, өкінетінін көрсеткен. Оның сөзінше, сотталған адамға антиәлеуметтік тұлғалық бұзылыс диагнозы қойылмаған және түрмедегі тәртібі жақсы болған.
