Италия премьер-министрі Джорджа Мелони мектептерде бурка мен никаб киюге тыйым салуды, сондай-ақ сыныптардағы шетелдік оқушылардың санын шектеуді көздейтін заң жобасы қаралатынын мәлімдеді, деп хабарлайды Baspasoz.kz.
DW басылымының хабарлауынша, тиісті бастама Италия Министрлер кеңесінің қарауына ұсынылмақ. Мелони бұл туралы өзінің "Италия бауырлары" партиясының жастар қанаты ұйымдастырған фестивальде айтқан.
Премьер-министр италиялық оқушылар өз еліндегі сыныптарда азшылыққа айналмауы керек деген пікір білдірді.
"Италиялық балалар сыныпта өздерін азшылық ретінде сезінбеуі керек. Италиялық сыныпта италиялық балалар азшылыққа айналғандықтан, шетке ығыстырылғандай сезінуі дұрыс емес", – деді Мелони.
Ол мектепке адамның жүзі ашық күйде келуі тиіс екенін де атап өтті.
"Мектепке жүзіңді ашып бару керек. Италияда ешкім жас әйелді шынайы немесе ойдан шығарылған дәстүрге байланысты өзін жасыруға мәжбүрлей алмайды", – деді премьер-министр.
Бұдан бөлек, Италия билігі бір сыныптағы шетелдік оқушылар санына шектеу енгізуді қарастырып отыр. Мелонидің айтуынша, итальян тілін білмейтін балалардың үлесі шамадан тыс көбейсе, олардың қоғамға бейімделуі қиындайды.
