Ұлыбритания өз спутниктерін ғарыштағы ықтимал қауіп-қатерден қорғау үшін алғаш рет арнайы әскери бөлім құрды. Елдің Қорғаныс министрлігі 23 қыркүйекте Корольдік әскери-әуе күштерінің құрамында №3 Space Effects Squadron бөлімшесі жасақталғанын мәлімдеді, деп Baspasoz.kz тілшісі Kazinform.kz-ке сілтеме жасап хабарлайды.
Жаңа бөлімнің міндеті – Ұлыбританияның ғарыштағы мүдделеріне бағытталған әрекеттерге тойтарыс беру және маңызды спутниктердің жұмысын қорғау. Бұл спутниктер әскери байланыс пен барлау жүйелерінде, зымыран ұшырылымдарын анықтауда, навигацияда, сондай-ақ күнделікті байланыс пен ауа райын болжауда пайдаланылады.
Әскери мамандар заманауи радиоэлектрондық күрес құралдарын қолданады. Мұндай технологиялар қарсы тараптың сигналдары мен электрондық жүйелерінің жұмысын бұзуға мүмкіндік береді. Британ билігінің мәліметінше, жаңа бөлім қорғаныс сипатындағы міндеттермен қатар шабуыл бағытындағы ғарыш операцияларына да қатыса алады. Алайда мұндай операциялардың нақты мазмұны жарияланған жоқ.
Ұлыбритания бұл қадамды елдің спутниктік технологияларға тәуелділігінің артуымен түсіндіреді. Спутниктер байланыс, навигация, ауа райын болжау және төтенше жағдай кезінде жедел қызметтердің жұмысын қамтамасыз етуде маңызды рөл атқарады. Ұлыбритания Қорғаныс министрі Уэс Стритингтің айтуынша, қазіргі ғасырда ғарыштағы мүмкіндіктерді бақылаудың маңызы арта түседі. Ол ғарыштағы қауіптердің ауқымы, жылдамдығы мен күрделілігі өсіп келе жатқанын атап өтті.
Ал Ұлыбритания Әскери-әуе күштері штабының басшысы Харв Смит ғарыштың енді әскери операцияларды қамтамасыз ететін қосалқы сала ғана емес екенін мәлімдеді. Оның сөзінше, ғарыш тікелей әскери бәсеке жүретін ортаға айналып келеді.
Жаңа эскадрилья – британдық Әскери-әуе күштерінің ғарыш бағытындағы үшінші арнайы бөлімшесі. Бұған дейін құрылған екі бөлім ғарыштағы нысандарды бақылап, ықтимал қауіп туралы ескертуге жауап береді. Ал жаңа құрылым анықталған қауіпке тікелей қарсы әрекет етуге бағытталған.
Сонымен бірге Лондон ғарыш кеңістігін бейбіт әрі тұрақты пайдалану қағидаттарын ұстанатынын мәлімдеді. Ұлыбритания орбитада қоқыс қалдыратын жойқын спутникке қарсы зымыран сынақтарынан ресми түрде бас тартқан және БҰҰ аясында ғарыштағы жауапты іс-қимыл қағидаларын қолдап келеді.
Ұлыбритания ғарыштық қорғанысқа бөлінетін қаржыны да ұлғайтпақ. 2026/27–2029/30 жылдары ғарыштық барлау, бақылау және ғарыштағы қауіптерге қарсы іс-қимылға 880 млн фунт стерлинг инвестициялау жоспарланған.
