3 қараша, сейсенбі күні әлемдік нарықта мұнайдың негізгі түрлері қымбаттады. Алайда ресейлік Urals маркалы мұнайдың бағасы төмендеді, деп Baspasoz.kz тілшісі Kazinform.kz-ке сілтеме жасап хабарлайды.
Oilprice.com мәліметінше, Brent маркалы мұнайдың бір баррелі 104,85 долларға жетті. Оның құны 0,08 долларға немесе 0,08 пайызға өскен.
Ал америкалық WTI маркалы мұнайдың бағасы 0,27 долларға қымбаттап, барреліне 96,73 доллар болды. Бұл – алдыңғы көрсеткішпен салыстырғанда 0,28 пайызға жоғары.
Сонымен қатар ресейлік Urals мұнайы арзандады. Оның бір баррелі 1,82 долларға немесе 1,77 пайызға төмендеп, 101,12 доллар деңгейінде саудаланды.
Мұнай бағасының өзгеруіне не әсер етті?
Әлемдік нарықтағы бағаның өсуіне Таяу Шығыстағы қақтығыстың шиеленісуі ықпал етіп отыр. Әсіресе Ормуз бұғазы арқылы кемелер қозғалысының күрт азаюы мұнай жеткізіліміне қатысты алаңдаушылықты күшейтті.
Аймақтағы жағдай ушыққанға дейін аталған бұғаз арқылы әлемдік мұнай мен табиғи газ жеткізілімінің шамамен бестен бірі тасымалданған.
Иран Ислам революциясы сақшылар корпусының әскери-теңіз күштері таратқан мәліметке сәйкес, 25 қазаннан бері Ормуз бұғазында ереже бұзған 11 танкер өртеніп, олардың кейбірі суға батқан. Бұл ақпаратты Kazinform агенттігі жариялады.
Бұдан бөлек, Йемендегі хуситтер Сауд Арабиясының Даммам және Джизан қалаларындағы әуежайларға ұшқышсыз ұшу аппараттарымен шабуыл жасағанын мәлімдеді. Сондай-ақ олар ерте ескерту радиолокациялық жүйесі мен әскери-көлік ұшағына соққы бергенін хабарлаған.
Таяу Шығыстағы тұрақсыздық мұнай тасымалына қауіп төндіріп, әлемдік нарықтағы бағаның құбылуына әсер етіп отыр.
