Қазақстан шетелдік студенттерге арналған гранттарды кеңейтуді талқылады

Қазақстан шетелдік студенттерге арналған гранттарды кеңейтуді талқылады
Gov.kz

Қазақстанда шетел азаматтарына бөлінетін мемлекеттік білім гранттарын халықаралық даму бағдарламаларымен ұштастыру мәселесі қаралды, деп хабарлайды Baspasoz.kz.

Ғылым және жоғары білім министрі Саясат Нұрбек KazAID Қазақстандық халықаралық даму агенттігінің басқарма төрағасы Нұрғали Арыстановпен кездесті. Жиында Қазақстанның жоғары білім саласындағы халықаралық байланыстарын нығайту және шетелдік студенттерге арналған мүмкіндіктерді кеңейту жолдары талқыланды.

Тараптар "Study in Kazakhstan" бағдарламасын KazAID агенттігімен бірлесіп ілгерілетуге ерекше назар аударды. Сондай-ақ шетел азаматтарына берілетін мемлекеттік стипендияларды Қазақстанның басқа елдердің дамуына қолдау көрсету саясаты аясында пайдалану мүмкіндігін қарастырды. Мұндай бастама шетелдік жастардың Қазақстанда білім алуына жол ашып қана қоймай, елдер арасындағы ғылыми, мәдени және экономикалық байланысты нығайтуға ықпал етуі мүмкін.

Қазақстан жыл сайын шетелдіктерге 550 грант бөледі

Ғылым және жоғары білім министрлігі 2019 жылдан бері "Study in Kazakhstan" бағдарламасын жүзеге асырып келеді. Оның басты мақсаты – шетелдік талапкерлерді қазақстандық жоғары оқу орындарына тарту және отандық білім беру жүйесін әлемге таныту. Бағдарлама бойынша жыл сайын шетел азаматтарына 550 мемлекеттік білім гранты ұсынылады. Оның 490-ы бакалавриатқа, 50-і магистратураға, ал қалған 10-ы докторантураға арналған.

Қазақстанда білім алуға қызығушылық танытқан 30 елдің қатарында Қытай, Моңғолия, Ауғанстан, Бангладеш, Йемен, Нигерия, Судан және Өзбекстан бар. Шетелдік студенттер әл-Фараби атындағы Қазақ ұлттық университетінде, Л.Н. Гумилев атындағы Еуразия ұлттық университетінде, Satbayev University, Astana IT University, М.С. Нәрікбаев атындағы университетте және еліміздің өзге де жоғары оқу орындарында білім ала алады.

Кездесуде халықаралық стипендиялық бағдарламалардың маңызы да сөз болды. Мұндай жобалар серіктес мемлекеттерге білікті мамандар даярлауға көмектесіп, Қазақстанның білім мен ғылым саласындағы беделін арттыруға мүмкіндік береді.

Сонымен қатар білім беру бағдарламаларын халықаралық даму тетіктерімен байланыстыру Қазақстанның Орталық Азиядағы білім және ғылым орталығы ретіндегі орнын нығайтуға септігін тигізуі мүмкін.

Кездесу соңында министрлік пен KazAID өкілдері осы бағыттағы бірлескен жұмысты жалғастыруға және алдағы ынтымақтастықтың нақты мүмкіндіктерін пысықтауға уағдаласты.