Алматыда алдағы күндері күн күрт суытып, алғашқы қар жаууы мүмкін. Ал Астанада жаңбыр аралас қар жауып, түнгі ауа температурасы 7 градус аязға дейін төмендейді. «Қазгидромет» 22–24 қазанға арналған ауа райы болжамын жариялады, деп Baspasoz.kz тілшісі Tengrinews.kz-ке сілтеме жасап хабарлайды.
Синоптиктердің мәліметінше, еліміздің екі ірі қаласында да ауа райы құбылмалы болады. Әсіресе, Алматыда температура айтарлықтай төмендеп, жаңбырдың соңы қарға ұласуы ықтимал.
Астанада ауа райы қандай болады?
22 қазан – күн ала бұлтты, аздаған жаңбыр мен қар жауады. Солтүстік-батыстан соққан желдің жылдамдығы секундына 9–14 метрге, екпіні кейде 15–18 метрге жетеді. Ауа температурасы түнде 0...+2, күндіз +4...+6 градус болады.
23 қазан – жауын-шашын күтілмейді. Солтүстік-батыстан және солтүстіктен секундына 5–10 метр жылдамдықпен жел соғады. Түнде ауа температурасы -3...-5 градусқа дейін төмендеп, күндіз 0...+2 градус шамасында сақталады.
24 қазан – күн ала бұлтты, жауын-шашынсыз. Оңтүстік-батыстан соққан желдің жылдамдығы секундына 5–10 метр болады. Түнде -5...-7 градус аяз болып, күндіз ауа +2...+4 градусқа дейін жылынады.
Алматыда алғашқы қар 23 қазанда жаууы мүмкін
22 қазан – қалада жауын-шашын болмайды. Солтүстік-батыстан секундына 3–8 метр жылдамдықпен жел соғып, екпіні кейде 13 метрге жетеді. Түнде +4...+6, күндіз +14...+16 градус жылы болады.
23 қазан – ауа райы күрт өзгеріп, жаңбыр аралас қар жауады деп болжанып отыр. Солтүстік-шығыстан соққан желдің екпіні секундына 13 метрге дейін күшейеді. Түнде ауа температурасы 0...+2, күндіз +7...+9 градус болады.
24 қазан – жаңбыр мен қар жалғасып, кей жерлерде тұман түседі. Солтүстік-шығыстан секундына 3–8 метр жылдамдықпен жел соғады, екпіні 13 метрге жетуі мүмкін. Түнде 2–4 градус аяз болып, күндіз ауа температурасы +3...+5 градус шамасында болады.
Қазақстанға суық ауа ағыны жақындап келеді
Бұған дейін «Қазгидромет» мамандары ел аумағына суық антициклон жақындап келе жатқанын хабарлаған.
Жаңбыр мен қар әкелген циклонның орнын суық ауа ағыны басады. Соның әсерінен алдымен батыс өңірлерде күн суытып, кейін салқын ауа райы Қазақстанның өзге аймақтарына таралады. Синоптиктер кей өңірлерде ауа температурасы 10 градус аязға дейін төмендеуі мүмкін екенін ескертті.
Осылайша, Алматы тұрғындары 23 қазанда алғашқы қарды көруі мүмкін. Ал елордада алдағы күндері түнгі аяз күшейеді.
