Қазақстан 2025 жылғы Жаһандық инновациялар индексінде (Global Innovation Index) «Білім беру» көрсеткіші бойынша Орталық және Оңтүстік Азия елдері арасында бірінші орынға ие болды. Ал әлемдік рейтингте 68-орынға тұрақтады, деп хабарлайды Baspasoz.kz.
Елімізде білім беру жүйесін жетілдіру, оқу сапасын арттыру және заманауи мектептер салу бағытында бірқатар жоба жүзеге асырылып жатыр. Мемлекет басшысы Қасым-Жомарт Тоқаевтың бастамасымен қолға алынған реформалар білімнің қолжетімділігін қамтамасыз етуге және мұғалімдердің кәсіби әлеуетін арттыруға бағытталған.
Қазақстан Халықаралық менеджментті дамыту институтының (IMD) Әлемдік бәсекеге қабілеттілік рейтингінде де көрсеткішін жақсартқан. Атап айтқанда, білім беру саласы бойынша еліміз 2021 жылы 69 мемлекеттің ішінде 45-орында болса, 2025 жылы 38-орынға көтерілген. Бұл – соңғы бес жылдағы ең жоғары нәтиже. Сонымен қатар Қазақстан орта білім беру жүйесіндегі мұғалімдер мен оқушылар санының арақатынасы бойынша 69 елдің арасында екінші орынға жайғасты. IMD-ның Әлемдік таланттар рейтингіне сәйкес, елімізде әр педагогке орта есеппен 8,34 оқушыдан келеді.
Білім беру инфрақұрылымын жаңарту жұмыстары да жалғасуда. «Келешек мектептері» ұлттық жобасы аясында 460 мың оқушыға арналған 217 заманауи білім ордасы салынған. Жаңа мектептер оқушылардың білім алуына қолайлы жағдай жасауға және оқу орындарындағы орын тапшылығын азайтуға бағытталған.
Бұдан бөлек, педагогтерді қолдау, олардың кәсіби біліктілігін арттыру және білім беру сапасын жақсарту бойынша шаралар жүзеге асырылып жатыр.
Халықаралық рейтингтердегі нәтижелер Қазақстанның білім беру саласындағы көрсеткіштерінің өзгерісін көрсетеді. Бұл ретте білім сапасын арттыру, мектеп инфрақұрылымын дамыту және педагогтердің еңбек жағдайын жақсарту білім беру саясатының негізгі бағыттарының бірі болып қала береді.
