Қазақстанда 2026 жылдың алғашқы тоғыз айында прокуратура органдарының араласуымен 917 азаматтың конституциялық құқығы қалпына келтірілді, деп хабарлайды Baspasoz.kz.
Ведомствоның хабарлауынша, Конституциялық Соттың шешімдерін орындау аясында прокурорлық қадағалау және ден қоюдың 130 актісі енгізілген. Азаматтарға жалпы сомасы 1,88 миллион теңгеден астам қаражат қайтарылып, жұмыста үш сағаттан артық болмағаны үшін қызметінен босатылған 18 адам қайта жұмысқа орналастырылған.
Шетелге көшкен азаматтың зейнетақысы қалпына келтірілді
Конституциялық Соттың 18 мамырдағы қаулысына сәйкес, азаматтың шетелде тұруы зейнетақы төлемдерін тоқтатуға негіз бола алмайды. Бұл ретте заңда белгіленген талаптар сақталуы тиіс.
Жетісу облысында прокуратура шетелге тұрақты тұруға көшкен Қазақстан азаматының зейнетақысы заңсыз тоқтатылғанын анықтады. Прокурорлық шаралардан кейін оның құқығы қалпына келтірілді.
Ата-аналарға заңсыз өндірілген қаражат қайтарылды
Шымкентте сот шешімі өз пайдасына шыққан ата-аналардан жеке сот орындаушыларының қызметі үшін негізсіз ақы алынғаны белгілі болды. Прокуратураның араласуымен үш азаматқа 249 750 теңге қайтарылды.
Осындай заң бұзушылықтар Астана қаласы мен Солтүстік Қазақстан облысында да анықталған. Прокурор наразылығынан кейін заңсыз қаулының күші жойылып, жеке сот орындаушысы тәртіптік жауапкершілікке тартылды.
Сонымен қатар жыл басынан бері прокуратура органдары азаматтардың құқықтарын қорғау мақсатында 32 семинар, 131 кездесу, 48 дөңгелек үстел және 183 дәріс өткізген. Әлеуметтік желілерде 522 түсіндіру іс-шарасы ұйымдастырылып, БАҚ-та 116 материал жарияланған.
Бас прокуратура Конституциялық Сот шешімдерінің орындалуын бақылау және азаматтардың бұзылған құқықтарын қорғау жұмыстары жалғасатынын атап өтті.
