18 қазанда Қазақстанның тоғыз қаласында ауаға таралған зиянды заттардың мөлшері артуы мүмкін. Синоптиктер тұрғындарға сақтық шараларын ұстануға кеңес берді, деп Baspasoz.kz тілшісі Kazinform.kz-ке сілтеме жасап хабарлайды.
«Қазгидромет» мәліметінше, бүгін Қостанай, Павлодар, Қарағанды, Жезқазған, Балқаш, Теміртау, Ақтөбе, Алматы және Астана қалаларында қолайсыз метеорологиялық жағдай қалыптасуы ықтимал.
Мұндай жағдай желдің бәсеңдеуі, тұман түсуі және ауа қабаттарындағы температураның өзгеруі салдарынан туындайды. Соның әсерінен зиянды заттар жоғары көтеріліп, таралудың орнына жерге жақын ауа қабатында жиналып қалуы мүмкін. Нәтижесінде қалалардағы ауа сапасы төмендеп, тұрғындардың денсаулығына кері әсер ету қаупі артады. Әсіресе тыныс алу жолдары, жүрек-қан тамырлары аурулары және аллергиясы бар адамдар сақ болғаны жөн.
Тұрғындар қандай сақтық шараларын ұстануы керек?
Мамандар ауа сапасы нашарлаған кезде көшеде ұзақ жүрмеуге кеңес береді. Әсіресе көлік көп жүретін жолдар мен өндіріс орындарының маңында серуендеуді шектеген дұрыс.
Балалар мен жүкті әйелдерге таза ауада ұзақ уақыт болмаған жөн. Ал созылмалы аурулары бар адамдар сыртқа шыққанда дәрігер тағайындаған дәрілерін өзімен бірге алып жүруі керек.
Сондай-ақ ашық ауада жүгіру, жаттығу жасау және ауыр дене еңбегімен айналысу ұсынылмайды. Спортпен шұғылдану үшін жабық ғимараттарды таңдаған дұрыс.
Синоптиктер ауа сапасына желдің жылдамдығы, жауын-шашын, ылғалдылық пен температура тікелей әсер ететінін ескертеді. Сондықтан тұрғындарға ауа райы болжамын қадағалап, күнделікті жоспарын соған қарай құрған жөн.
