Қазақстанда отбасының әлеуметтік жағдайына қарай белгіленген санат өзгеруі мүмкін. Еңбек және халықты әлеуметтік қорғау министрлігінің өкілдері брифинг барысында Отбасының цифрлық картасындағы мәліметтер тұрақты түрде жаңартылып отыратынын түсіндірді, деп хабарлайды Baspasoz.kz.
Мемлекеттік ақпараттық жүйелердегі деректер негізінде әр ай сайын отбасы мүшелерінің саны, табысы және тұрмыс деңгейі қайта бағаланады. Мәселен, отбасы мүшелерінің бірі жұмыссыз қалса немесе үйдің қаржылық жағдайы едәуір өзгерсе, бұл әлеуметтік санатты қайта қарауға негіз болады. Соның нәтижесінде отбасы мемлекеттік көмек алуға құқылы санатқа өтуі мүмкін.
Алайда әлеуметтік санаттың өзгеруі жәрдемақы бірден тағайындалады дегенді білдірмейді. Мемлекеттік қолдау көрсету үшін заңда белгіленген өзге де талаптардың орындалуы тексеріледі.
Сондықтан азаматтардың жеке деректері мемлекеттік жүйелерде дұрыс көрсетілуі маңызды. Егер ақпарат ескірсе немесе қате енгізілсе, оны уақытылы түзету қажет. Бұл отбасының әлеуметтік жағдайын дұрыс бағалауға және тиісті мемлекеттік көмекті алу мүмкіндігін анықтауға ықпал етеді.
