Қазақстанда азаматтарға зейнетақы жинақтарын басқарудың жаңа мүмкіндігін ұсыну жоспарланып отыр. Енді салымшылар жинақтарының 100%-ына дейінгі бөлігін жеке басқарушы компанияларға сеніп тапсыра алады. Бұл туралы Орталық коммуникациялар қызметінде өткен брифингте айтылды, деп хабарлайды Baspasoz.kz.
Жоспарланған өзгерістерге сәйкес, әрбір азамат зейнетақы қаражатын басқаратын компанияны және өзіне тиімді деп есептейтін инвестициялық стратегияны өз бетінше таңдау мүмкіндігіне ие болмақ. Бұл салымшыларға жинақтарын инвестициялау тәсілін дербес анықтауға жол ашады. Алайда мұндай шешім қабылдаған азаматтар қаржылық тәуекелдерді де ескеруі қажет.
Мемлекеттік кепілдік сақтала ма?
Еңбек және халықты әлеуметтік қорғау министрлігінің мәліметінше, зейнетақы жинақтары толық көлемде жеке басқаруға берілген жағдайда да нақты аударылған міндетті зейнетақы жарналарының сақталуына қатысты мемлекеттік кепілдік күшінде қалады.
Дегенмен бұл инвестициядан міндетті түрде пайда түседі дегенді білдірмейді. Салымшы таңдаған инвестициялық стратегияға байланысты туындайтын тәуекелдер үшін өзі жауап береді. Яғни басқарушы компанияның инвестициялық шешімдері күткен нәтижені бермеуі мүмкін. Сондықтан азаматтарға жинақтарын сеніп тапсырмас бұрын компанияның қызметін, қаражатты инвестициялау тәсілдерін және ықтимал шығындарды мұқият зерделеу ұсынылады.
Зейнетақы қаражатын жеке басқаруға беру тәртібі мен мемлекеттік кепілдіктің қолданылу шегі қолданыстағы заңнамаға сәйкес белгіленеді.
Жоспарланған өзгерістердің негізгі мақсаты – азаматтардың зейнетақы жинақтарын басқарудағы таңдау мүмкіндігін кеңейту және инвестициялық шешім қабылдауға қатысуын арттыру.
